إذا كنتِ تهتمين بجسمج ادخلي و صدقيني ما راح تندمي

[حبر وورق]

بسم الله الرحمن الرحيم

أختي الغالية

السلام عليكم و رحمة الله و بركاته

شحالج؟؟ عساج بخير؟؟

أكيد بما أنج دخلتي موضوعي فأنتِ إنسانه تهتمين بنفسج و موضوعي هذا مب بس بيكون له تأثير على جزء بسيط من جسمج مثل الوجه أو البشرة بشكل عام لا هو بيأثر عليج داخلياً و خارجياً.

بس ترى الموضوع طويل و أختي أقترحت أنزله ع جزئين بس أنا أشوف الأفضل أنزله مرة واحدة فأتمنى تصبرين و تتحملين و تقرينه لنهــــــــــــــــاية



طبعاً في البداية أبي أخبرج ليش أنا نزلت هالموضوع، الله يسلمج كنت أتصفح النت و قريت مثل ما تعرفين مواضيع حق كثير من البنات و هالمواضيع هدفها وااااااااااااااااااااحد و هو شلون يصيرون ضعاااااااااااااااااف و أعيد و أكرر ضعاااااااااااااااف يعني من اللي قريته و خططهم هم يبون يضعفون و يصيرون مثل اللي يشوفونهن في التلفزيون و المجلات ووو. طبعاً بتقولين لا هن يهتمن بشرب 8 أكواب من الماء في اليوم و يكثرون من الخضروات و الفواكه و بقول لج هذا شيء طيب بس معقولة نظام غذائي واحد يصلح للكل طبعا يا حبيبتي لا و بخبرج ليش

بس تابعي معي

و قبل ما أبداً بخبرج إن أنا عندي بكالوريوس "علوم الغذاء و التغذية" طبعاً الشيء المؤسف أنا كل من هب و دب قاعد يفتي و كأن التغذية مب علم حاله حال كل العلوم و لكن أكيد بيجي يوم و بيحصل هذا العلم التقدير و الاحترام اللي يستحقه

سوري طلعت شوي برى الموضوع بس لأني مقهورة

نرجع لموضوعنا... شوفي حبيبتي أنا ما بقولج خلي وزنج مناسب لطولج و من هالكلام و لكن بعلمج بعض الأمور اللي بإذن الله بتخليج تعرفين وزنج الصحي يعني بالإنجليزي Healthy weight

أول شيء بغض النظر أذا كنتِ تبين تضعفين أو تمتنين أو تحافظين على وزنج اللي عاجبج لازم تعرفين شغلة و هي مقدار الطاقة اللي تكتسبينها بالمقارنة مع الطاقة اللي تفقدينها يعني كل المأكولات و المشروبات اللي نتناولها تعطينا كلوريز أو طاقة معينة و كل نشاط نمارسه يخلينا نفقد جزء من هالطاقة حسب النشاط و بالتالي اللي تبي تضعف لازم تفقد من الطاقة أكثر من اللي تكتسبه و العكس بالنسبة للي تبي تمنن أما اللي تبي تحافظ على جسمها لازم يكون الداخل يساوي الخارج

زين يا حلوة

أول شيء لازم نعرف شلون نحسب وزنا الصحي... عندنا الله يسلمج أكثر من خطوة



أو شيء عندنا شيء أسمه Body Mass index يعني بالعربي مؤشر كتلة الجسم و هو يعطينا حسبه سرررررريعة لحالة الجسم يعني هل الوزن طبيعي أقل من الطبيعي أو زائد و بالتالي نقدر نتوقع المشاكل الصحية اللي ترتبط بالوزن، طيب شلون تحسبينه

مؤشر كتلة الجسم = الوزن (كيلوجرام) / مربع الطول (بالمتر)

ملاحظة صغيرونه قبل ما أكمل ترى المعادلة اللي فوق فقط للبالغين أما الأطفال لهم معادلة ثانية


نكمل


يعني مثلاً خل نفرض عندنا شخص أسمه أحمد وزنه 85 كيلو جرام و طوله 1.90متر

بالتالي مؤشر كتلة الجسم ل "أحمد" = 85 كيلوجرام / (1.90)² متر
مؤشر كتلة الجسم ل "أحمد"= 22.37
طيب شو يعني..

الله يسلمج عندنا جدول حق مؤشر كتلة الجسم يعني إذا حسبتي المؤشر و طلع:
أقل من 18.5 هذا يعني أن وزنج أقل من الطبيعي
من 18.5 – 24.9 طبيعي
25.0 – 29.9 زيادة بالوزن
30.0 و طالع سمنة



و بالتالي أحمد وزنه طبيعي


طيب، أنت تبين شيء دقيق ... حياج

عندنا شيء أسمه Ideal Body Weight أو بالعربي وزن الجسم المثالي هذه معادلة شوي معقدة بس هذي مب مشكلة هذا اللنك إن شاء الله بيساعدج

http://www.hpathy.com/healthtools/body-weight.asp

شو تسوين
1. أول شيء تختارين Your gender يعني الجنس Male ذكر Female أنثى
2. بعدها تدخلين Your height يعني طولج
3. و بعدها تدخلين Your body frame or frame size يعني خل نقول بالعربي و الله ما أعرف شلون أترجمه المهم هذا هو مربط الفرس تعرفين ليش لانج بدخلين حجم الجسم أو size في الحسبه يعني أحيانا يمرون علينا أشخاص ضعااااااااااااف بس عظامهم عريضة و أحيانا العكس و هذا الشيء وايد يأثر في الوزن الصحي اللي المفروض تكونين عليه و للعلم ترى الوزن الصحي يكون في Range يعني ما يقول لج أنتِ لازم يكون وزنج مثلا 55 لا بيقول لج أنتِ ممكن يكون وزنج من 50 إلى 60 بس ال 55 هو الأمثل.

أدري طفشتج بس ما عليه تحملي شوي
نكمل
طيب شلون تدخلين frame size أو شيء لازم تحسبينه بهالمعادلة السهلة

Frame size= الطول بالسنتيميتر / محيط الرسغ أيضا بالسنتيميتر

يعني مثلاً أحمد (مسكين سويته فأر تجارب) طوله مثل ما خبرتج 1.90 متر يعني بالسنتيميتر 190 و محيط رسغه 15 سم

و هذا الرسغ



بالتالي الFrame size = 12.6 يعني small

طبعا لازم ترجعين لهالجدول عشان تعرفين أنت small or medium or large

أول شيء الرجال
أكبر من 10.4 صغير small or light
من 9.6 – 10.4 متوسط medium
أقل من 9.6 كبير large or heavy

أما البنات الحلوات
أكثر من 11.0 صغير small or light
من 10.1 – 11 متوسط medium
أقل من 10.1 كبير large or heavy

طبعا أكيد اللحين أنتِ تسألين في شو يأثر، الله يطول عمرج اذا كان frame size لج صغير بالتالي بنقص 10% من وزنج اللي المفروض تكونين عليه لو كان frame size لج متوسط و بنزيد عليه 10% لو كان frame size لج كبير و هذا أكيد بيأثر على شكلج يعني لوكان سيزج كبير و عطيناج وزن المتوسط بتبينين ضعيفة و العكس و لو كان سيزج صغير.

حتى جربي تحسبين وزنج بس كل مرة غيري ال size و شوفي الفرق


Ok

نرجع لأحمد (شكلي بأخذ واحد اسمه أحمد ) و نحسب وزنه الصحي أو المثالي و نرررررررررروح للنك و ندخل البيانات و طلع عندنا أن وزنه لازم يكون ما بين 71.7 و 88 و الأمثل له 79.7 ... كلللللللللللللللللللللللللللللوش أحمد وزنه مثل ما حسبناه قبل......

طبعاً بعدها تقدرين تحسبين كم سعر حراري تحتاجين باليوم بس أنا ما أبي أشربك الموضوع زيادة

Ok

هذي كانت أول شغلة ليش أنا مب موافقة أن الكل يمشي على برنامج واحد

ثاني شيء هو

أولاً أنا مؤمنه أن ما في شيء الله خلقه لنا إلا و له فائدة يعني الكربوهيدات الدهون البروتينات ووو كلها مهمة مب وحدة تقول أنا بشل الدهون لانها تعطيني واااااااااااااااايد كلوريز... صح أن الدهون تعطي سعرات حرارية تقريباً ضعف اللي تعطيها الكربوهيدات أو البروتينات بس بعد تحتوي على أشياء مفيدة لأجسامنا و لازم نسنهلكها بس طبعا هذا ما يعني يا أختي أنج تصبين اليوم كل الدهن فوق العيش و يلا بالخمس


تذكري قول المصطفى – صلى الله عليه و سلم - (ما ملأ آدمي وعاء شرا من بطن ، حسب ابن آدم أكلات يقمن صلبه ، فإن كان لا محالة : فثلث طعام ، وثلث شراب ، وثلث لنفسه)
يعني الإعتدال

أخبر أيام الجامعة كانوا الدكاترة دائماً يقولون الغذاء اللي يتناوله الفرد لازم يكون

Moderate & Balance

يعني معتدل و متوازن



ثانياً إن كل أنسان له إحتياجات مختلفة يعني الطفلة مب مثل الراهقة مب مثل البالغة مب مثل الحامل مب مثل المرضع مب مثل العيوز ........ أدري اللحين بدوسين في بطني لو كنت جنبج

بس ما عليه حياتي خل أخلص بعدين سوي اللي تبينه

هذا على فرض أن كلهن ما عندهن مشاكل صحية

أما اذا صارت في مشاكل صحية مثل (و الأكثر شيوعاً في واقعنا)
فقر الدم "الأنيميا"
نقص فيتامين د
هشاشة العظام
الكالستيرول
الحساسية لبعض الأطعمة مثلاً في ناس عندهم حساسية من البيض أو السمك أو الباذنجان أو الزعتر
إلتهاب أو قرحة المعدة
وووووو

فأكيد الأختلاف في النظام الغذائي بيزيد

فلازم تنتبهين عزيزتي قبل لا تقررين تتبعين نظام فلان ولأ علان هل هو يتناسب مع حالج و عمرج و إحتياجاتج

بعطيج مثل صغيييييييييييير

كم تحتاج من عنصر الحديد؟






شفتي كل عمر له إحتياجاته فما بالج لو هذا الشخص بهذا العمر و هو عند نقص أكيد بيحتاج دعم

المهم هذي بعض المواقع المتخصصه اللي أرجو أنها تفيدج

http://www.acnut.com/index.php

هذا لنك المركز العربي للتغذية و هو يمكن يكون أقرب واحد لنا مب بس لانه عربي و لكن لانه خليجي... يعني عمرج سمعتي أقصد قريتي بموقع أجنبي يتكلم عن أكلتنا الشعبية أكيد لا و لكن الدكتور عبدالرحمن مصيقر تكلم بالهموضوع


بس للأسف مافي وايد مواقع عربية

علمية

متعلقة بالتغذية "عرفتي ليش أنا مقهورة"



طبعاً يمكن البعض يتسأل ليش أنا دائما أقول أجانب و عرب و خليجين وووو

هل تعرفين أنها تفرق... هي مش تعصب و لكن فعلا في اختلافات ترجع للأصول و أبسط مثال على هذا هو مثلا الأفارقة يتميزون بلون البشرة الداكن و الشعر المجعد الخشن ووو


طبعاً في علوم التغذية في حسابات و قياسات كثيرة عشان يحددون الوزن المثالي و عندنا شيء أسمه skinfold thickness و هي طريقة نقيس فيها الدهون بالجسم و تتأثر بللون البشرة...





طبعاً غير التغذية في شيء وايد مهم لكن في عالمنا العربي و خصوصا عندنا احنا الخليجين "طبعا مب الكل" رايح في خرايطها ألا و هو الرياضة

بعض الرياضة المفيدة و اللي ممكن تمارسينها بسهولة و بشكل يومي مثل المشي الأعمال المنزلية استخدام السلم بدل المصعد ووو و لمدة 20-30دقيقة باليوم

طبعاً أنا مش متخصصه بالرياضة بس هذا اللي أعرفه و أتمنى البنات اللي تخصصهن رياضة يفيدونا أكثر...

أدري طولت واااااااااااااااااايد بس أتمنى أن الموضوع فادج واذا عجبج و كنتٍ مقتنعة ما أبي منج إلا دعوة طيبة صادقة من قلبج في ظهر الغيب

و طبعا الموضوع جهد شخصي...

تحياتي

أختج

حبر وورق
nice paper

[روح الطفول]

مجهودشخصي تشكرين عليه


جزاك الله ووفقك للمزيد

[نبرة حنين]

تسلميين اختي ع المجهووود الشخصي

[kimokono55]

تسلميين اختي

[حبر وورق]

روح الطفول

نبرة حنين

kimomokono55



شكراً على المرور الطيب و الردود الأطيب

و أتمنى أنكم استفدتوا من الموضوع

[الحلوه السمره الشرقيه]

يسلموو اختي موضووع حلو وان شاء الله استفيد منه

[حبر وورق]

الحلوه السمره الشرقية





ألف شكــــــــــــــــــــــــــر

[تالا30]

يسلمو اختي الموضوع اكتر من رائع

[مرايــــــــــــــــــــــــم]

موضوعج واااااااااااااايد مفيد
يعطيج الف عافيه

[حبر وورق]

تالا 30
مرايـــــــــــــــــم

نور الموضوع

ألف شكر عالتشجيع

حسبت الموضوع ما عجب البنات أو أنه كان دسم