سلام ...
أنا كنت حاضرة هالعرس
أنا أعرف العروس و ما شاء الله عليها يناسبها هالعرس و الله يهنيها يا رب .. و مثل ما قالت لكم
بحرينية و كلي فخر .. التفاصيل صحيحة .. الصراحة أنا ما أذكر سالفة الملاعق الزرقاء و لا التوزيعات (يمكن وزعوها في الأخير بعد ما أنا مشيت) .. بس باقي التفاصيل مثل ما ذكرتها .. العرس وايد كان رومانسي و حلو .. و القاعة إللي يشوفها ما يقول هذه هي نفسها إللي في الصور ...
كان أغلب الديكور مثل ما باين في الصور من الورود الطبيعية و مركبين فيها أضواء و مصابيح صغيرة مثل ما لاحظتو الثريا المعلقة عند المدخلو بعد تحت الطاولات كانو حاطين إنارة فتبين الشراشف حوالين الطاولات منورة .. كله على بعضه كان حلو و رومانسي و خيالي ..
و سالفة الظلام حلوة و رومانسية بس عيبها إن الناس ما يبينون حتى العروس و إللي يرقصون كانو مبينين بس مو بشكل واضح جداً جداً خصوصاً للي قاعدين بعيد مثلي و القاعة كبيرة فما تساعد على وضوح الرؤية .. لو شوي مزيدين الكشافات المسلطة على العروس كان بيكون أفضل بس بعد ما كان هالشي مسيئ للحفلة بشكل ملحوظ .. بالعكس كان الجو العام منسق و حلو
و الإسبوع إللي بعده بعد رحت عرس في نفس القاعة .. بعد كان شي خرافي .. كان منظر القاعة مختلف تماماً الأنوار قوية و الستائر على جوانب القاعة بيضاء و القاعة كأنها حديقة من كميات الورود الرهيبة إللي كانت فيها و الطاولات عليها تحف من الكرستال و الفضيات .. و أحيت العرس الفنانة أصالة بالإضافة إلى دي جي .. صج كان عرس فخم
و توني من كم يوم رحت عرس بعد في نفس القاعة .. بعد شكلها مختلف تماماً .. ما كانو حاطين ستائر أو ديكورات على الجدران لكن الكوشة كانت ملكية .. و أكثر شي مميز إن الشارع خارج الفندق كان مزين بالعرض لمسافة حوالي 200 متر خارج الفندق .. و العروس و المعرس جابوهم في عربة مثل عربات سندريلا تجرها الخيول .. و من بعد ما دخلو القاعة كان في البداية في مطربة عراقية (ما أعرف إسمها) غنت بعدها المطربة البحرينية هند و من بعدها دخل أبو المعرس و بعض الرجال عشان يحيون المعرس و مع دخولهم عرضو فلم على الشاشات الكبيرة في القاعة فيه شعر إهداء من أم المعرس للعائلة و لزوجها و ولدها المعرس .. و بعدين غنوا هذا الشعر (غنته هند) و لما كان أبو المعرس بيطلع من القاعة دخلت فرقة "عرضة" و قاموا يرقصون بالسيوف لين ما طلعوا و طلع معاهم المعرس .. عقبها كانوا جايبين نبيل شعيل
إللي شعللها ما يحتاج أوصف في أغانيه الحلوة .. و التوزيعات أشكال و ألوان .. يعني تقدرون تتخيلون فخامته و حلاته هالعرس .. الله يهنيهم و يسعدهم يا رب
أنا ما أروح عروس بس صارت صدفة هالثلاثة أعراس في فترات متقاربة و في نفس المكان و بنفس المستوى
و الله يهني و يحفظ الجميع و يبارك لهم و عقبال إللي ما عرسوا
مواضيع مشابهة 
النمط المتتابع
