شنو صار بالنسبة اللي وظفوهم في تخصص الخدمة الاجتماعية في وزارة التربية

[الكتكوتة3]

احد يدري شنو صار بالنسبة اللي وظفوهم في تخصص الخدمة الاجتماعية في وزارة التربية شنو صار عليهم لأني انا وحدة من اللي قبلوني في الخدمة الاجتماعية وحطوا رقمي الشخصي لكن للحين محد اتصل فينه حق فحص او بصمات اي شخص يعرف شئ يرد عليي لأن خايفة حدي اخاف خلاص بعد هالتعب يشيلون اسمنه ولا يوظفونه

[بنتي حبيبتي]

لا يا حبيبتي تطمني من مصادر موثوقه احنا راح نداوم هالكورس وان شاءالله خلال هالاسبوع راح ينادونا والله كريم هو مو لعب عيال

[دالية البيت]

الكتكوتة ...بنتي حبيبتي...اني بعد خدمة اجتماعية وقبلوني وطلع رقمي الشخصي بعد...بس مثلكم خايفة لان ما ادري ويش السالفه....واحس من كثر الانتظار اعصابي تلفت....الا خبروني انتون من سنة كم متخرجين...والله يسمع منش بنتي حبيبتي ويتصلون لينا هالسبوع....لان لاعت جبدي من اسألت الناس ولا عندي جواب ليهم

[الكتكوتة3]

اني تخرجت سنة 2004 يعني صار ليي الحين تقريبا خمس سنوات

[أنا الشوق]

مادام حطوا ارقامكم فتطمنوا
بس اذا خايفين ليش ماتتصلون أو تروحون لهم، احسن من ماتنتظرونهم هم يتصلون لكم

[صاحبة الظل الخفي]

تفائلوا بالخير

ان شاءالله بينادونكم جريب

[لهفة اشواقي]

ما في فايده لحد يروح

امس مجموعه من البنات راحوا حق مسؤول اعتقد اسمه ابراهيم عبدالكريم

وطمنهم وقال لهم انتظروا الاتصال وما في داعى للخوف

وانه اتصلت حق موظف قال لى ان في اشكاليه بين ديوان الخدمة المدنيه وصندوق العمل واهوة ما يعرفها

لكن قاعدين يحلونها



ما لنا غير الصبر

ادعوا ان الله يسرها لنا جميعا

وامانه اللى تحصل خبر اتخبرنا

[بنت السيف]

السلام عليكم بنات الخدمة ... شخباركم

امس وديت ولدي المدرسة ... عاد اول يوم له .. وبغيت انقله من صف إلى صف ثاني لان معلمته ما يمدحونها ..

وقعدت اسولف مع المشرفة ... مسكينة كان داير راسها بروحها ... وسألتها ليش ما يكون مشرفتين في المدرسة .. قالت ان المدرسة ما وصلت 500 طالب بس 400 وشوي ... صج اكسرت خاطري

على فكرة هذي المدرسة كنت اتدرب فيها قبل اربع سنوات وكانت فيها مشرفتين ونفس الصفوف ونفس العدد .

انزين وبعد ما كنت مستانسة ... وكلمتها عن نفسي( يعني اني مشرفة بس للحين ما تعينت ) .. قالتلي ان تعرف وحدة خريجة يديدة توة متعينة في مدرسة حليمة السعدية ... ( مشرفة )

بصراحة جنها كتت علي ماي بارد ...وقلت لها اكيد توظيفها من تحت لي تحت من طرف الوزارة .. بس احنا من طرف صندوق العمل .

ردت علي وقالت اي اكيد من تحت لي تحت ..

وسلامتكم ..

[دالية البيت]

السلام عليكم ورحمة الله وبركاته....شخباركم بنات الخدمه...اشلون معنوياتكم....اليوم واحد اعرفه وقريب مني واجد ...يعرف واحد في الوزارة قسم التوظيف...سأله عن توظيف خريجات الخدمة الاجتماعيه...قال ليه قريب ان شالله بيتصلون حقهم...لأن صاير واجد زحمة على الوزارة الحين فتبغي بالأول تنتهي من مشاكل المدرسين وتنقلاتهم وبعدين بيتصلون حق خريجات الخدمة الاجتماعيه وقال ان شاءالله خلال يومين يتصلون فيهم والله واعلم..العهدة على الراوي..والتوفيق من عند رب العالمين...والله يحلها من عنده بحق هذا الشهر الكريم وحرمته وبحق محمد وآله الطاهرين ..يارب اتفرج لينا خريجات الخدمه في القريب العاجل بحق كل من له حق عليك..وترزق كل طالب حاجة من المؤمنين يارب العالمين.

[ام ديار]

زييييين خواتي وإألي ما حطو ارقامهم الشخصية ولا اسمائهم بالجرايد ؟
وشو مصيرهم يعني ؟

في حد عنده خبر ولا معلومات؟؟؟؟؟؟؟؟؟؟؟؟؟؟