تجمع للمتزوجات واللي ساكنين في بيت اهل زوجها تعالو نفضفض لبعض

[ام الثامنه عشر]

السلام عليكم ورحمه الله وبركاته
اليوم ان شاء الله بندردش عن المتزوجات اللي ساكنين في بيت اهل زوجها يعنى كم سنه تمتي عندهم وبعدين طلعت وفي شو ساكنها عندهم في غرفه او ملحق وشو المشاكل اللي استوت وكيف تغلبتي عليها وشو تطبخي بروحك او وياهم وانتي وياهم سمن على عسل او العكس يعنى خلونا نفيد بعض يلا نبى همه وفايدة من الكل

[ام الثامنه عشر]

بما اني اللي كاتبه الموضوع ببدي انا واعوذ من كلمه انا الله يسلمكم ساكنه في بيت اهل زوجي من ثمان سنوات وماشاء الله بيتنا متروس يعني تقريبا فيه حوالي35 شخص بس الحين شوي خفو يعني عائلتين طلعوا واستقروا في بيت خاص فيهم وابو زوجي ماشاء الله عليه عنده حرمتين الاولى عندها اربعه والثانيه ثمانيه وبالنسبه للطبخ كل يوم دور وحده من المتزوجات وعن المشاكل صراحه في البدايه وايد بس الحين قمت اتحاشهم واسوي اللي يحبونه وادوس على كرامتي لين مالله يكتب لي في بيت خاص لي

[totano]

انا بس حبيت اقول الله يكون في عونكم جميعا
وام الثامنه عشر الله يفرج همك وكربك وينزللك منزلا مباركا دائما ادعي فيها اللهم انزلي منزلا مباركا وانت خير الوراثين
واستفغري ربنا كتير الله يوفقك

[ام الثامنه عشر]

مشكوره يالغلا الله يسعدك

[سالفة جرح]

والله انا زواجي بعد شهر وبسكن قريب عند اهله
الله يستر وربي خايفه من هالحياة من كثر ماسمعت عنها


بعد شهر بجي اصف جنبكم واحكيلكم عن وضعي

[ونيت قلبي]

وانا عمتي طيبه وااايد نحن جنات
ثلاثه انا ثانيه تحبنا وتحترمنا نحنا نحبهاواايد انا صارلي ساكنه عندهم من خمس سنوات وعندي بنتين وساكنه في غرفه وحمام وعندنا خدامتين شغل البيت كله عالخادمه حتى في تنظيف غرفتي وحمامي ونحن اسره كبيره فالبيت ماشاءالله،الاكل عالخادمه الفطور والغدا عليها بس العشا كل وحده تسوي حق زوجها .

[مرمريه]

الشكوه لله الحمد لله

[صاحبة الدمعة]

السلام عليكم انا واحدة من اللواتي يسكن في بيت العائلة في الحقيقة عيشة تزهق انا عندي غرفة وصالون صغير لكن الطبخ مع بعض والحمام وكل شئ مشترك وانا اصغرهم اي الاخيرة في الترتيب الاولى والثانية طلعو كل واحد ببيت مستقر اما انا والثالثة التي هي ابنت اخ حماتي واختها التي تربي فيها حماتي مع بعض عملين فيا الويل كل شئ على راسي وعملين عليا حلف وانا عندهم مند عامين تقريبا شفت فيه المر ,لدا اؤجل الانجاب الى ان يفرج الله كربي , في الحقيقة افكر احيانا بالعودة الى اهلي لكن حبي لزوجي كبير للاننا تزوجنا عن حب رغما عن اهله لكن استغفر الله وادعوه ان يفرج همي ويرزقني ببيت صغير ودرية صالحة لكي يهنأ العيش لي مع من احب . اسفة للانني اطلت الموضوع لكن اريد ان تستفيد الاخوات المقبلات على الزواج من تجربتي , في الاخير ادعو لي الستر والرزق الطيب لكي لااخسر زوجي وحياتي .المعدبة صاحبة الدمعة

[ريماس الغلا]

أنا ساكنه عند اهل زوجي صارلي سنه ونص وعندي غرفه وحمام.

والحمدلله على كل حال

[ماما حسون]

امممممممممممممم
انا ساكنة ببيت اهل زوجي ، في شقة او ملحق .. من غرفتين وصالة ومطبخ وحمام وحواشي صغيره بعد خخخخخ ، منفصلة عن بيت عمي بينا بس شباك وباب شقتي بروحه يعني لو بزورهم لازم اطلع في الشارع واروح ادخل من بابهم <<< بس عيالي يستخدمون الشباك علشان يروحون ههههههههههههه

وصار لي اكثر من 5 سنين من تزوجت بس في البداية كان نظام شقتي غير شوي وما كنت منفصله عنهم رغم ان بابي موجود لكن كان في طريق من داخل وكنت أكل معاهم في شهر رمضان ولما ادخل واطلع كنت اضطر امر عليهم يعني يدرون اني طالعه او داخله وما كنت مرتاحه وايد من هالوضع وتمينا على هالحال يمكن سنتين وبعدين سووا تعديلات في البيت وانسد الطريق اللي بيني وبين بيت عمي وصار بابي بروحي واكلي بروحي وكل شي بروحي ومنفصله عنهم بس الحمدلله واااااايد اريح لي الحين على الاقل ادخل واطلع بكيفي واكل بروحي حتى في شهر رمضان بروحي مع اني غالبا اذا بطبخ لنا اطبخ بعد حق اهله ( ما في الا امه وابوه لان اخوانه وخواته كلهم متزوجين ) والحمدلله على كل حال مرتااااحه



الله يرزقني ويرزقكم ببيت العمر ونستقر فيه مع ازواجنا وعيالنا