بنات جده _ قاعات الافراح ؟ ؟ (اول موضوع لي )

[moly amal]

السلام عليكم ورحمةالله وبركاته

هذا اول موضوع ليا هنا يارب بس اكون كتبته في موقعه وما اكون اتجاوزت القوانين

بصراحة احتاج لمساعدة كبيرة واي معلومات ممكن تفيد

ابغى قاعات او فنادق بجدة تقيم زواجات و ملكات طبعا بجدة

تكون اسعارها جيدة و مجربة من قبلكم او من قبل احد من قرايبكم او اصدقائكم

لازم يكون بها بلكونة ضروري جدا

اعتذر عن هذا كله بس اللي عنده اي ملومة ياريت تساعدوني

جزاكم الله خير على تعاونكم

انتظر منكم الرد باقرب وقت

[بنت الغالي]

الله يوفقك غاليتي


تم تعديل العنوان ليناسب الموضوع

[آياتي]

هلا اختي انا مثلك حايسه بالقاعات الله يسهلك يارب

اليوم انا رايحه اشووف قاعه ورحت قبل يومين اتفرجت

وليا رجعه ان شاءالله واقوولك كيف

بس ياقلبي تبين ملكة ولا فرح وياليت تحددي السعر لانو زي ماتعرفي الاسعار متفاوته

وليا عوده بكرا ان شاءالله

[lateefa]

بصراحه يابنات انا لفيت نص قاعات جده علشان زواج اخوي بالصيف

وفيه قاعات تجنن عندك مثل
نسايم ليل _الشرق الاوسط_ليالي العرب_كرستال هذي اللي عجبتني كثير

[آياتي]

هلا اختي

زي ماقالت الاخت lateefa احلى شي دي القاعات وباضافه لقاعه نرسيان

بس تختلف الاسعار هنا في توصل لــ70 الف الليله طبعا يكون كلوو افخم شي

ولو حابه قاعه لملكه في قاعات كتيرة تنفع ملكة عندك فندق الدار البيضاء قاعاتوو كتيرة وتختلف الاسعار

وفي فندق ارمادا برضوو وحلوو وتنفع لملك ع حسب حددي طلبك والسعر وان شاءالله افيدك

تقبلي مروري

[danndanh]

وعليكم السلام ورحمة الله وبركاته

أختي بصراحة أنا ملكتي قريب والحمد لله ما لفيت كتير حتى لقيت القاعة

أنا راح أعمل ملكتي إن شاء الله في قاعة رومانس

لو كنتي سمعتي عنها بس للأسف ما فيها بلكونة

لكن فيها حاجات تانية أحلى

يعني العصير والكيك ولبس الدبل كلها تكون من ورا مو قدام المعازيم

لأنو في حوش خارجي ديكورو غابات ومسبح وجسر وشلال مررررررة روووووووعة

وهادا كلو يتصور فيديو وينعرض بعد كدا ع البروجكتر جوا القاعة

وسعرها مناسب

وأنا أنصحك فيها

حتى المشرفة سعودية وبنت مرررررررررررة متعاونة وخدومة

لو تبغي عنوانها أرسليلي أوكي


وبالتوفيق إن شاء الله للجميع

[رؤيتي]

الله يتمم لي ويتمملكم على خير..
انا كمان عروسه وبفكر بقاعه سعرها طيب وحلوه..
وانا ضد الـ 70 الف لليله لييييييش انشاءالله..
قاعة نرسيان حلوه خالي سوا فيها فرحه كلفته 27 الف من غير البوفيه..
وقاعة ليالي الكريستال حلوه بس ما اعرف سعرها..
وقاعة رومانس حلوه اختي سوت فرحها فيها.. بس مشكلتها البنات السعوديات اللي فيها هم بنات صاحب القاعه وصحيح انهم متعاونات واخلاقهم حلوه..
بس اللي صار لنا انه اللي طلبناه كله في (( البكج )) طلع غلط..
الكوشه كانت غير الكوشه اللي طلبناها ومافيها ورود طبيعيه كلها زينه
والكيكه كانت اي كلاااام
والطقاقه قالت انا عندي طقاقه مررره كويسه وعلى ضمانتي
ويوم الفرح نلاقي وحده معفنه لابسه جلابيه حقت بيت تقولنا الطقاقه تعبانه وانا اقربلها وجيه اغني بدالها
وصوتها الله لايوريكم..
بس نصيحتي اختي اللي بتسوي ملكتك فيها انتبهي لهذي الاشياء..
والله يتمم لك ملكتك على خير..

[danndanh]

ويييي

طيب اش اسم المطربة إلي قالتلكم عليها أختي رؤيتي

بليييييييييييز ردي عليا في أقرب فرصة

:"(

[مووواهب]

فيه قاعه حلوه في فندف جده اوركيد قاعة الطاؤوس

فيها بلكونه وحجمها مناسب لملكة وسعرها مدري عنو

[moly amal]

جزاكم الله خير
والله يوفقك ويتم اموركم بخير
قاعة الكريستال وليالي الكريستالعلى حسب ما قالت لي صديقتي عملت ملكتها هناك
ليالي الكريستال وسط الاسبوع 20 او 22و الاربعاء والخميس 25 او28 طبعا السعر بدون البوفيه ويختلف وقت الاجازات عن وقت الدراسة
والله يجزيكم كل خير امين