متى يشتد الطفل الرضيع (تكفوون طمنوني )

[عازفة الناي]

السلام عليكم ورحمة الله

ولدي الصغير عمرة الان شهرين وخايفة عليه مرررررة

لانه مايثبت رقبته كويس .. متى يثبت الطفل ويشتد وممكن ترفعينه من غير ماتمسكين راسة بايدك

تكفوووووون طمنوني لان قلبي متليع من قبل

هو لما يكون على بطنه يرفع راسة ثواني وبعدين ينزله

هل هذا طبيعي او لا ومن عمر كم يثبت كويس ولا يحتاج لمساعده لمسك الراس

لاتقولون ودية لدكتور لانه يقول طبيعي بس انا ابي من خبرتكم

لان صاحبتي بنتها اكبر منه بشهر وتقول ثبتت رقبة بنتها من زمان ما شاء الله

تكفون لا تطنشون وطمنوني .. والله يجزاكم خير ويفرج عنكم كل شدة وضيقة ..

[ايميلا]

حبيبتي ان شاء الله مافيه غير العافيه 00

اسمعي كلام الدكتور ولاتخافين

عسى الله يعافيه ويخليه لك

[عازفة الناي]

مشكوورة حبيبتي على الرد

بس الدكاترة طمنوني في ولدي الكبير وللأسف هو مريض الان

بس اتمنى اسمع خبرات البقية ..

[و غارت الحور]

ان شاالله مافيه الا العافية.حبيبتي يختلف من طفل لآخر لا تقارنين ولدك بحد اخي الصغير عمره شهرين و للحين مايرفع راسه في حين بنتي ترفع راسه من لما انولدت ماشاالله لا تحاتين الولد المهم صحته زينة و طمنينا عليه

[عازفة الناي]

مشكووورة حبيبتي على الرد

والله يطمنك بالخير ..

بس انا احاتية لاني خايفة يكون مثل اخوة

والحمدلله اشوفة طبيعي بس سالفة الرقبة مخوفني

والله يجزاك خير ..

[عروس جنان]

عزيزتي لما تحملي بنتج مسكي رقبتها وقمطيهــا
انا كنت اقمط ولدي لحد ما صار عمره اربعـة اشهر ونص...
وان شاء الله بتشتد لا تحاتيـــــــــن...

[angel eyes]

حبيبتي كل طفل يختلف عن الثاني حتى الاخوان نفسهم يختلفون...

طبيعي طفلك بعده ما يشل راسه...مع انه في اطفال في سنه ممكن يشيلون راسهم...يعني مثل ما قلت لج يتفاوت الشي من طفل للثاني...خليه نايم على بطنه بس تحت ملاحظتج و بتشوفينه يرفع راسه..طبعا هالشي يعتبر تمرين عشان يقوي عضلات رقبته
وماعليه شر ان شالله ..والله يشفيلج اخوه

[فلونة فلونة]

هلا الغالية يختلف من بنية طفل لاخر

انا بنتي رغم انها اول مولودة لي يعني ما عندي خبرة ابدا بس امي كانت تقمطها زين زين وامسكي راسها لا تخليه يتلوح ويتحرك يمين ويسار وصدقيني لمدة اربعة اشهر او ثلاثة اشهر بالكثير وان شاء الله بيصير راسه ثابت

[am slooh]

أن شاء الله مافي ألا العافيه
بما أن الدكتور طمنك الحمد لله
وأنا أقولك على الأربع شهور يشد والأطفال يختلفون ما نقدر نقارن بينهم
أذا عندك مخاوف من ظهور نفس حالة أخوه الله يشفيه ....... الواجب تشرحين للدكتور سبب خوفك والحاله بالظبط حتى يقوم بالفحوصات اللازمه

[عازفة الناي]

مشكورات خواتي على تطمينكم لي

والدكتور عارف بحالة اخوة .. وانا ماودي يسوون له اشعه مقطعية وهو توه صغير

مترجية من الله انه يكون سليم

والف شكر لافادتكم والله يجزاكم خير ..